کتنی ہم نے عمر گزاری
اللہ سے ہے کتنی یاری
نافرمانی کتنی کی اور
کتنی کی ہے تابع داری
دل کی اپنے کھول کتاب
آؤ بچو ! کریں حساب
پہلے ہم تحقیق کریں گے
ہر شے کی تصدیق کریں گے
جمع کریں گے پیار، محبت
نفرت کو تفریق کریں گے
ختم کریں جھگڑے کا باب
آؤ بچو ! کریں حساب
نیکی کو ہم ضرب کریں گے
لاکھ ،کروڑ کو ارب کریں گے
جتنے ہم نے گناہ کیے ہیں
صفر سے ان کو ضرب کریں گے
تب نکلے گا صحیح جواب
آؤ بچو ! کریں حساب
رب کی ہم تعظیم کریں گے
آپس میں تفہیم کریں گے
بے کس اور مظلوموں کے ہم
سارے دکھ تقسیم کریں گے
بدلے میں پائیں گے ثواب
آؤ بچو ! کریں حساب